پکتیکا کې د محتسبینو په هڅو یوه مېرمن له کورني تاوتریخوالي څخه وژغورل شوه
د پکتیکا ولایت د امربالمعروف، نهی عن المنکر او شکایتونو اورېدلو ریاست محتسبینو په مټاخان ولسوالۍ کې د مېرمنو د حقونو ورکړې او په دې برخه کې د ناوړه کړنو د مخنیوي په موخه یوه مېرمن له کورني تاوتریخوالي څخه وژغورله.
د محتسبینو په وینا: یاده مېرمن،چې له تېرو څو کلونو راهیسې د خسر ګنۍ له لوري د بې معنی غیرتونو او ناوړه د دودونو په اساس ځورول کېدله او له فزیکي او رواني تاوتریخوالي سره مخ وه د محتسبینو په هڅو وژغورل شوه.
محتسبین زیاتوي، چې په پوره توګه د مېرمنو د شرعي حقونو ورکړې ته ژمن دې او هېڅ چاته به اجازه ور نکړي چې د مېرمنو شرعي حقوق تر پښو لاندې کړي.
د یادولو وړ ده، چې د یاد وزارت محتسبینو په تېره دلوه میاشت کې د هېواد په کچه، د مېرمنو حقونو ته د رسېدنې په برخه کې له (۱۰۰) څخه زیاتو بېلا بېلو قضیو ته رسېدنه کړې، چې پکې د میراث، کورني تاوتریخوالي، ولور، په بدو کې ورکړې او غیر شرعي نکاح ګانو قضیې حل شوې دې.
