د امربالمعروف، نهي عن المنکر او شکایتونو اورېدلو وزیر شیخ الحدیث مولوي محمد خالد الحنفي جنوب ختیځو ولایتونو ته د سفر پر مهال پکتیا کې له دیني عالمانو، متنفذینو او قومي مخورو سره ناسته وکړه
د امربالمعروف، نهي عن المنکر او شکایتونو اورېدلو وزیر شیخ الحدیث مولوي محمد خالد الحنفي جنوب ختیځو ولایتونو ته د خپل رسمي سفر پر مهال په پکتیا کې د پکتیکا، خوست، لوګر او غزني ولایتونو له دیني عالمانو، قومي مخورو، متنفذینو او مسؤلینو سره د امربالمعروف، نهي عن المنکر او شکایتونو اورېدلو وزارت د شرعي قانون د تطبیق، د معروفاتو اقامې او د منکراتو د مخنیوي په موخه ناسته وکړه.
محترم شیخ صاحب د ناستې ګډونوالو ته وویل: په افغانستان کې د حاکم اسلامي نظام ساتنه او دفاع تر هر چا وړاندې ستاسې مسؤولیت دی، ځکه نظام اسلامي دی شرعي امیر لری او په راس کې یې ټول علماء دي. د اسلامي امت رهبري د علماوو مسؤولیت دی، ځکه باید له اسلامي نظام څخه په کلکه دفاع او ساتنه وکړئ.
شیخ صاحب زیاته کړه: زموږ د څلورو لسیزو جهاد هدف د بشپړ او مطلق شریعت تطبیقول دي، تر څو مو چې په ټوله جغرافیه کې دین په بشپړ ډول نه وي حاکم کړی، ټول به مسؤول یو!
دغه راز شیخ صاحب د خپلو خبرو پر مهال وویل: په تېر شل کلن اشغال کې یرغلګر د فزیکي اشغال تر څنګ فکري اشغال ته ډېر متوجه وو. دوی د افغانانو د بېلارې کولو، پر دین د خلکو بدګمانه کولو او دیني ارزښتونو د بدنامۍ لپاره په بېلابېلو لباسونو کې کار وکړ، چې اوس د دې ټولو بدیو مخه نیول زموږ او ستاسې شرعي مسؤلیت دی.
د ناستې په پای کې له یادو ولایتونو راغلیو علماء کرامو، متنفذینو او قومي مخورو هم پخپل وارسره خبرې وکړې او د امربالمعروف نهی عن المنکر د شرعي قانون په تطبیق کښي له محتسبینو سره مرسته او په ټولنه کې د معروفاتو اقامه او د منکراتو مخنیوی یې خپل شرعي مسؤلیت یاد کړ.
د یادولو وړ ده، چې د امربالمعروف، نهي عن المنکر او شکایتونو اورېدلو وزیر شیخ الحدیث مولوي محمد خالد الحنفي څو ورځې وړاندې شمالي ولایتونو ته د سفر په لړ کې د بدخشان، تخار، بغلان، بلخ، سمنگان، جوزجان، فاریاب، کندز او سرپل ولایتونو له دیني عالمانو، متنفذینو او قومي مخورو سره هم ناستې وکړې او د ولایتي سفرونو دا لړۍ به دوام ولري.
