امر بالمعروف، نهی عن المنکر او شکایتونو اورېدلو وزارت په اونۍ کې
د امربالمعروف، نهی عن المنکر او شکایتونو اورېدلو وزیر شیخ الحدیث مولوي محمد خالد الحنفي ولایتونو ته د خپل رسمي سفر په لړ کې د هېواد د شرقي زون له دیني عالمانو، ځایي مسؤلینو، متنفذینو او قومي مخورو سره، د امربالمعروف وزارت د قانون د تطبیق، ناوړه دودونو د مخنیوي او په دې برخه کې د همکارۍ په موخه ناستې وکړې.
د مېرمنو حقونو ته رسېدنه:
د امربالمعروف وزارت ولایتي محتسبینو په دې اونۍ کې د مېرمنو د حقونو اړوند (۱۱۵) بېلابېلې قضیې حل کړې دي، چې د یادې شمېرې له مخې (۵۳) د کورني تاوتریخوالي، (۱۴) د میراث، (۱۱) د غیر شرعي نکاح ګانو،(۱۳) د ولور، (۱۰) د نفقې ورکړې، (۸) مېرمنو ته د شرعي نکاح زمینه برابرولو او (۶) د طلاق قضیې حل شوې دي.
د قومي دښمنیو حل:
د دې وزارت ولایتي مسؤولینو په ټولنه کې د قومي او ژبني تعصباتو د مخنیوي او د یووالي روحیې د پياوړې کولو لپاره د هېواد په ځینو (۱۳) لویې دښمنۍ او (۴۸) وړې شخړې حل کړې دي.
د کوډګرو نیول:
دغه راز محتسبینو په ټولنه کې د ناوړه دودونو د مخنیوي، ټولنیز عدالت د تأمین او د خرافاتو د مخنیوي په موخه په پکتیکا،پروان،بلخ، تخار، سرپل او کابل ولایتونو کې (۸) تنه کوډګر نیولي او د شرعي پرېکړې په موخه یې، عدلي او قضایي ارګانونو ته ور پېژندلي دې.
له سوداګرو سره ناستې:
محتسبینو په بازارونو کې د سود، احتکار، ترازو کې د کموالي، د تاریخ تېر او بې کیفیته موادو د خرڅلاو د مخنیوي په موخه له سوداګرو او هټۍوالو سره (۲۱۸) اصلاحي ناستې کړې دې.
