د افغانستان اسلامي امارت د امر بالمعروف، نهی عن المنکر او شکایتونو اورېدلو وزارت وزیر، شیخ الحدیث مولوي محمد خالد حنفي، د خپل ولایتي سفرونو په لړ کې د نورستان ولایت د دواب ولسوالۍ ته سفر وکړ.
نوموړي د یادې ولسوالۍ له مجاهدینو، مسؤولینو، قومي مخورو، علماوو او ولسي خلکو په جوړه شوې سترې غونډه کې ګډون او مهمه وینا وکړه.
د ناستې په پیل کې شیخ الحدیث مولوي محمد خالد حنفي د نورستان ولایت د مجاهدینو سرښندنې او قربانۍ وستایلې او ویې ویل چې د نورستان مجاهدینو د هېواد پر وړاندې د هر ډول یرغل او اشغال په مقابل کې په مېړانه مبارزه کړې او د اسلامي نظام د حاکمیت لپاره یې بېساري قربانۍ ورکړې دي.
شیخ صاحب همداراز مسؤولینو ته په خطاب کې وویل: «تاسو په خپلو ساحو کې د اسلامي نظام د رهبرۍ استازي یاست؛ له خلکو سره باید ښه رویه، نیک چلند، نرمښت او اسلامي اخلاق مراعات کړئ.»
شیخ صاحب مسؤولینو او مجاهدینو ته د خپلو مسؤولیتونو د درک او ادا کولو په اړه ټینګار وکړ او ویې ویل: «که موږ نن خپلو مسؤولیتونو ته متوجه نه شو، که نن څوک زموږ پوښتنه ونه کړي، سبا به د الله تعالی په وړاندې د خپلو مسؤولیتونو په اړه پوښتل کېږو او له دې مسؤولیت څخه د خلاصون لاره نه لرو.»
شیخ صاحب همداراز له ولسونو څخه د یووالي او وحدت غوښتنه وکړه او ویې ویل چې د اسلامي نظام په شتون کې د قوم، ژبې، سیمې او نورو تعصباتو او تبعیضونو لپاره ځای نشته. نوموړي له ولسونو وغوښتل چې د ورورولۍ، یووالي او اتفاق فضا لا پیاوړې کړي او د اسلامي نظام د ثبات او پرمختګ لپاره په ګډه هڅې وکړي.
د امر بالمعروف او نهی عن المنکر په اړه شیخ الحدیث مولوي محمد خالد الحنفي وویل چې د معروفاتو د خپرولو او له منکراتو څخه د مخنیوي مسؤولیت یوازې د یوې ادارې نه، بلکې د ټولنې ګډ مسؤولیت دی. همداراز شیخ صاحب له مسؤولینو او عام ولس څخه وغوښتل چې د منکراتو د مخنیوي په برخه کې له یو بل سره همکاري وکړي او د اسلامي ارزښتونو د ساتنې لپاره ګډ کار وکړي.
هغه زیاته کړه چې د اسلامي نظام له اساسي موخو څخه یوه هم د شریعت د احکامو نافذول او عملي کول دي؛ له همدې امله باید د امر بالمعروف او نهی عن المنکر د قانون د تطبیق په برخه کې جدي اقدامات ترسره شي او د ټولنې د اصلاح لپاره لازمې هڅې وشي. چې دا کار لومړی علماء کرام، متنفیذین، او مخور خلګ کولی شي.
شیخ صاحب په پای کې د نظام او ولس ترمنځ د متقابل مسؤولیت او خدمت پر اړیکه ټینګار وکړ او ویې ویل: «نظام له ولس څخه عبارت دی او ولس له نظام څخه عبارت دی؛ موږ ستاسو خادمان یو، نه حاکمان.»
نوموړي د اسلامي نظام د مسؤولینو او ولسونو ترمنځ د متقابل اعتماد، همکارۍ، ورورولۍ او ښه چلند پر پیاوړتیا ټینګار وکړ او د ټولنې د اصلاح او د اسلامي ارزښتونو د پیاوړتیا لپاره یې د ګډو هڅو غوښتنه وکړه.
