د امر بالمعروف وزارت له لوري ټاکل شوي هیئت د ولسونو د همغږي په موخه پنځو ولایتونو ته سفر وکړ
د امر بالمعروف، نهی عن المنکر او شکایتونو اورېدلو وزارت اړوند د شکایتونو اورېدلو معین شیخ صدیق الله او ور سره مل پلاوي د وزارت مقام د رهبرۍ پر اساس له امارتي مسؤلینو او ځایي خلکو سره د امر بالمعروف وزارت د نوي جوړ شوي قانون د اورولو او لا ښه تطبیق په موخه بدخشان، تخار، کندز، بغلان او سمنګان ولایتونو ته سفر وکړ.
د وزارت له لوري استول شوي شپږ کسیز هیئت د خپل سفر پر مهال د یادو ولایتونو له امارتي مسؤلینو، دیني عالمانو، قومي مخورو او ځوانانو سره په بېلابېلو ناستو کې له هغوی وغوښتل چې پخپلو اړوندو برخو کې د وزارت جوړ شوی قانون په پوره توګه پلی کړي او پر هغوی یې غږ وکړ، چې د یاد قانون په پلي کولو کې له محتسبینو سره مرسته وکړي.
د هیئت غړو پر امارتي مسؤلینو ټینګار وکړ، چې له خلکو سر ه له نرم او غوره چلند څخه کار واخلي او ستونزو ته یې پر وخت رسېدنه وکړي او زیاته یې کړه چې په امارتي اداراتو کې د تخلفاتو مخنیوي ته په پوره توګه ژمن و اوسي.
ورته مهال د هیئت غړو له دیني عالمانو، قومي مخورو او ځوانانو سره په جلا ناستو کې په ټولنه کې د هغوی کړنې حیاتي وبللې او له هغوی یې وغوښتل چې د عامه ذهنیت د سمون او د ناوړه دودونو په مخنیوي کې له محتسبینو همکاري وکړي.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت له ولري ټاکل شوی هیئت به ټولو ولایتونو ته له ځایي خلکو، دیني عالمانو او ځوانانو سره د همغږۍ او ګډو کړنو په موخه سفرونه وکړي.
