د امر بالمعروف، نهی عن المنکر او شکایتونو اورېدلو وزارت په اونۍ کې
د امر بالمعروف، نهی عن المنکر او شکایتونو اورېدلو وزارت مسؤلینو د اسلامي ارزښتونو د پالنې، مېرمنو د حقونو خوندیتوب، د قومي او ژبني دښمنیو د حل، ټولنیز عدالت د ټینګښت، د ټولنیز او اخلاقي سمون لپاره کړنې تر سره کړې دي.
د وزارت د رهبري له لوري له جهادي مشرانو، دیني عالمانو او قومي مخورو سره ناسته:
د امر بالمعروف، نهی عن المنکر او شکایتونو اورېدلو وزارت محترم وزیر شیخ الحدیث محمد خالد الحنفي له جهادي مشرانو، دیني عالمانو، قومي مخورو او ښوونکو سره په ټولنه کې د معروفاتو د اقامې، منکراتو د مخنیوي او د اسلامي نظام د پایښت لپاره د ګډې همکارۍ اومرستې په موخه لیدنه وکړه.
د مېرمنو حقونو ته رسېدنه:
د یاد وزارت ولایتي محتسبینو په دې اونۍ کې د مېرمنو د حقونو اړوند (۱۱۲) بېلابېلې قضیې حل کړې دي، چې د یادې شمېرې له مخې (۶۶) د کورني تاوتریخوالي، (۱۲) د میراث، (۱۱) د غیر شرعي نکاح ګانو،(۶) د ولور، (۵) د نفقې ورکړې، (۷) مېرمنو ته د شرعي نکاح زمینه برابره شوې او پاتې (۵) د طلاق قضیې حل شوې دي.
د قومي دښمنیو حل:
محتسبینو په ټولنه کې د قومي او ژبني تعصباتو د مخنیوي او د یووالي روحیې د پياوړې کولو لپاره د هېواد په کچه (۱۱) لویې دښمنۍ او (۵۵) وړې شخړې حل کړې دي.
د کوډګرو نیول:
دغه راز د امر بالمعروف وزارت محتسبینو په ټولنه کې د ناوړه دودونو د مخنیوي، ټولنیز عدالت د تأمین او د خرافاتو د مخنیوي په موخه (۲۴) تنه کوډګر نیولي او د شرعي پرېکړې په موخه یې، عدلي او قضایي ارګانونو ته ور پېژندلي دي.
له سوداګرو سره ناستې:
او وروستی خبر دا چې محتسبینو په بازارونو کې د سود، احتکار، ترازو کې د کموالي، د تاریخ تېره او بې کیفیته موادو د خرڅلاو د مخنیوي په موخه له سوداګرو او هټۍوالو سره (۲۱۸) اصلاحي ناستې کړې او اته ټنه تاریخ تېر توکي یې له منځه وړي دې.
