د امر بالمعروف، نهی عن المنکر او شکایتونو اورېدلو وزارت په اونۍ کې
د امربالمعروف، نهی عن المنکر او شکایتونو اورېدلو وزیر شیخ الحدیث محمد خالد الحنفي شمالي ولایتونو ته سفر:
د امربالمعروف، نهی عن المنکر او شکایتونو اورېدلو وزیر شیخ الحدیث مولوي محمد خالد الحنفي شمالي ولایتونو ته د خپل رسمي سفر پرمهال د بدخشان، تخار، بغلان، بلخ، سمنگان، جوزجان، فاریاب، کندز او سرپل ولایتونو له دیني عالمانو، ځایي مسؤلینو، متنفذینو او قومي مخورو سره، د امربالمعروف وزارت د قانون د تطبیق، ناوړه دودونو د مخنیوي او په دې برخه کې د ګډې همکارۍ په موخه ناستې وکړې.
د مېرمنو حقونو ته رسېدنه:
د امربالمعروف وزارت ولایتي محتسبینو په دې اونۍ کې د مېرمنو د حقونو اړوند (۱۰۱) بېلابېلې قضیې حل کړې دي، چې د یادې شمېرې له مخې (۴۷) د کورني تاوتریخوالي، (۱۳) د میراث، (۱۰) د غیر شرعي نکاح ګانو،(۸) د ولور، (۷) د نفقې ورکړې، (۱۱) مېرمنو ته د شرعي نکاح زمینه برابرولو او (۵) د طلاق قضیې حل شوې دي.
د قومي دښمنیو حل:
محتسبینو په ټولنه کې د قومي او ژبني تعصباتو د مخنیوي او د یووالي روحیې د پياوړې کولو لپاره د هېواد په کچه (۱۱) لویې دښمنۍ او (۴۴) وړې شخړې حل کړې دي.
د کوډګرو نیول:
دغه راز د امر بالمعروف وزارت محتسبینو په ټولنه کې د ناوړه دودونو د مخنیوي، ټولنیز عدالت د تأمین او د خرافاتو د مخنیوي په موخه په پروان، بلخ، سمنګان او کابل ولایتونو کې (۸) تنه کوډګر نیولي او د شرعي پرېکړې په موخه یې، عدلي او قضایي ارګانونو ته ور پېژندلي دې.
له سوداګرو سره ناستې:
محتسبینو په بازارونو کې د سود، احتکار، ترازو کې د کموالي، د تاریخ تېر او بې کیفیته موادو د خرڅلاو د مخنیوي په موخه له سوداګرو او هټۍوالو سره (۱۷۳) اصلاحي ناستې کړې دې.
