محتسبینو د زابل په مرکز قلات او څلورو ولسوالیو کې پنځه شخړې حل کړې
د زابل محتسبینو د مرکز قلات په ګډون په سیوري، اطغر، شینکۍ او شملزو ولسوالیو کې د ټولنیز ثبات، د قومي او ژبني تعصباتو د له منځه وړلو او د یووالي روحیې د پیاوړي کولو په موخه د کورنیو تر منځ پنځه شخړې حل او د ښکېلو اړخونو تر منځ یې روغه وکړه.
دا اوږد مهاله شخړې، چې د ټولنیزو ستونزو او ناوړه دودونو له امله رامنځته شوې وې د محتسبینو په هڅو او د سیمې د دیني عالمانو او قومي مخورو په منځکړیتوب حل شوې او د ښکېلو اړخونو تر منځ روغه وشوه.
د یادولو وړ ده، چې محتسبینو په ټولنه کې د نورو منکراتو د مخنیوي تر څنګ په تېره یوه میاشت کې په ټول هېواد کې د سلګونو لویو دښمنیو او وړو شخړو مخه نیولې او په دې اړوند یې کړنې لا هم دوام لري.
