تخار؛ محتسبینو کوډګر د کوډو له وسایلو سره نیولی دی
د تخار ولایت په مرکز تالقان ښار کې محتسبینو د خپلو کړنو پر دوام هغه کوډګر، چې له اوږدې مودې راهیسې یې د دم او تعویذ په نومونو د کورنیو ترمنځ نفاق او ستونزې جوړولې او د پیسو په بدل کې یې د کوډو او جادو ناوړه کړنې کولې؛ له ګڼ شمېر سحري کتابونو او غیر شرعي تعویذونو سره نیولی دی.
محتسبین یې په تړاو وایي: د ځایي خلکو له شکایت وروسته یې هغه کوډګر د کوډو او جادو له وسایلو سره نیولی، چې د کورنیو ستونزو د حل په پلمه یې له ځایي خلکو څخه پیسې اخیستلې او د کوډو او جادو ناروا کړنې یې کولې، چې د لا نورو څېړنو په موخه به عدلي او قضایي ارګانونو ته ور وپېژندل شي.
محتسبین ډاډ ورکوي، چې هېچا ته به اجازه ورنه کړي، څو په ټولنه کې خرافاتي او غیر شرعي کړنې ترسره کړي او له خلکو غواړي چې د ورته غیر شرعي پېښو په له منځه وړلو کې له محتسبینو سره همکاري وکړي.
دا په داسې حال کې ده، چې د امر بالمعروف، نهي عن المنکر او شکایتونو اورېدلو وزارت له لوري د کوډګرو پر کړنو له بندیز ووروسته تر دې مهاله زرګونه کوډګر نیول شوي او د شرعي پرېکړو له لپاره عدلي او قضایي ارګانونو ته سپارل شوي دي.
