محتسبینو په بلخ، سرپل او پکتیکا ولایتونو کې درې کوډګر نیولي دي
د بلخ، سرپل او پکتیکا ولایتونو محتسبینو د خپلو کړنو په لړ کې درې کوډګر؛ چې د دم او تعویذ په نومونو یې د کورنیو ترمنځ نفاق او ستونزې جوړولې او د پیسو په بدل کې یې پر خلکو کوډې کولې، له ګڼ شمېر سحري کتابونو او غیر شرعي تعویذونو سره یو ځای نیولي دي.
د یادو مسؤلینو په وینا: درې تنه هغه کوډګر یې د کوډو له وسایلو سره نیولي دي، چې د کورنیو ستونزو د حل په پلمه یې له ځایي خلکو څخه پیسې اخیستلې او غیرشرعي او د کوډو تعویضونه یې کول، چې د لا نورو څېړنو په موخه به عدلي او قضایي ارګانونو ته ور وپېژندل شي.
محتسبین ډاډ ورکوي، چې هیچاته به اجازه ورنه کړي، چې په ټولنه کې خرافاتي او غیر شرعي کړنې وکړي او له خلکو غواړي چې د ورته غیر شرعي پېښو په له منځه وړلو کې له محتسبینو سره همکاري وکړي.
دا په داسې حال کې ده، چې د امر بالمعروف، نهي عن المنکر او شکایتونو اورېدلو وزارت له لوري د کودګرو پر کړنو له بندیز وروسته تر دې مهاله زرګونه کوډګر نیول شوي او د شرعي پرېکړو لپاره عدلي او قضایي ارګانونو ته سپارل شوي دي.
