د امربالمعروف وزارت وزیر شیخ الحدیث محمد خالد الحنفي: د اسلامي نظام دفاع او ساتنه د افغانانو مشروع حق دی
د امر بالمعروف، نهې عنالمنکر او شکایتونو اورېدلو وزارت وزیر شیخ الحدیث محمد خالد الحنفي د اختر په لومړۍ ورځ د لغمان ولایت په مرکزي جامع جومات کې د وینا پر مهال ټینګار وکړ چې د هېواد او اسلامي نظام دفاع او ساتنه د افغانانو مشروع حق دی او د دین دښمنان به هېڅکله خپلو موخو ته ونه رسېږي.
نوموړي په پیل کې وویل، د لغمان ولس په جهادي بهیرونو کې پراخه ونډه اخیستې او ارزښتمنې قربانۍ یې ورکړي دي.
ښاغلي شیخ صاحب همداراز د یووالي پر ارزښت ټینګار وکړ او ویې ویل چې د اسلامي نظام د لا پیاوړتیا لپاره باید ټول خلک یو موټی شي او د اسلامي امارت عالیقدر مشرتابه احکام په ښه ډول تطبیق، تنفیذ کړي.
ښاغلي شیخ صاحب په هېواد کې روانو حالاتو او وروستیو تېریو ته په اشارې وویل، ځینې کړۍ او ګاونډیان هڅه کوي چې د پردیو پروژې مخته یوسي او اسلامي نظام ته زیان ورسوي.
د امر بالمعروف، نهې عنالمنکر او شکایتونو اورېدلو قدرمن وزیر افغانستان د علم، جهاد او انقلابونو ټاټوبی وباله او ویې ویل چې کفارو تل هڅه کړې څو د اسلامي نظامونه د ړنګ کړي او د مسلمانانو ترمنځ نفاق او غداري رامنځته کړي، خو د نوموړي په خبره دا هڅې به ناکامې شي.
ښاغلي شیخ صاحب د خپلو خبرو په پای کې د حجاب او نورو اسلامي ارزښتونو پر رعایت ټینګار وکړ او د منکراتو مخنیوی یې د ټولو مسلمانانو ګډ مسئولیت وباله.
دا په داسې حال کې ده، چې یاد وزارت په خپل اختریز پیغام کې هم د اسلامي ارزښتونو پر رعایت او یووالي ټینګار کړی وو.
