د زابل ولایت د امربالمعروف مسؤلینو د دې ولایت په (۱۱) ولسوالیو کې د مېرمنو د حقونو په تړاو اصلاحي ناستې وکړې
د زابل ولایت د امر بالمعروف، نهی عن المنکر او شکایتونو اورېدلو ریاست مسؤلینو په تېرو دوو اونیو کې د دې ولایت د مرکز قلات ښار په ګډون په (۱۱) ولسوالیو کې له ځایي خلکو سره د مېرمنو د حقونو د ورکړې او خوندیتوب په موخه ناستې وکړې.
مسؤلینو په دې اصلاحي ناستو کې د غیر شرعي نکاح ګانو، کورني تاوتریخوالي، میراث او د ناوړه دودونو پر اساس د مېرمنو د ځورونې د مخنیوي په موخه ناستې وکړې او ټینګار یې وکړ، چې هېڅ کوم وګړی باید د مېرمنو پر وړاندې له تاوتریخوالي ډک چلند څخه کار وانخلي.
ورته مهال د یاد ولایت مسؤلینو د خپلو کړنو پر مهال د دې ولایت په مرکز قلات، شاجوی، شملزو او اتغر ولسوالیو کې د درې غیر شرعي نکاح ګانو مخه نیولې او یادو مېرمنو ته یې خپل شرعي حقوق سپارلي دي.
دغه راز د دې ولایت محتسبینو د ټولنیز عدالت د تأمین او د خپل ټولنیز مسؤلیت له مخې په خاک افغان او ارغنداب ولسوالیو کې د قومي مخورو په منځګړیتوب درې قومي دښمنۍ حل کړې دي.
د یادولو وړ ده، چې د یاد ولایت محتسبینو تر دې وړاندې هم د مېرمنو د لسګونه قضیو د حل تر څنګ زیاتې دښمنۍ او قومي شخړې حل کړې دي او په دې پار یې کړنې لا هم دوام لري.
