د څلور کلن کورني تاوتریخوالي قرباني شوې مېرمن د محتسبینو له لوري وژغورل شوه
پکتیا ولایت پټان ولسوالۍ محتسبینو د سیمې د قومي مخورو په منځګړیتوب د ټولنې اصلاح او د مېرمنو د حقونو خوندیتوب ته په ژمنتیا یوه مېرمن له ( ۴ ) کلن فزیکي او رواني تاوتريخوالي وژغورله.
د یاد ولایت د پټان ولسوالۍ د محتسبینو په هڅو هغه مېرمن چې د خپلې کورنۍ ( خسر) له لوري له فزیکي او رواني تاوتریخوالي سره مخ وه وژغورله او د خسرګنۍ له غړو څخه یې ژمنه واخیستل شوه څو له دې وروسته ورته کړنې ترسره نه کړي او د مېرمنو پر وړاندې له تاوتریخوالي ډکو پېښو څخه ډډه وکړي.
محتسبین ډاډ څرګندوي، چې د خویندو د شرعي حقونو خوندیتوب ته ژمن دي او له ولسونو غواړي چې د خپلو مېرمنو، لوڼو او خویندو حقونه وپېژني، له تاوتریخوالي ډډه وکړي او د اسلامي تعلیماتو په رڼا کې نیک چلند غوره کړي.
د یادولو وړ ده، چې د امربالمعروف، نهې عن المنکر او شکایتونو اورېدلو وزارت محتسبینو د دې وزارت له لوري د مېرمنو د حقونو د خوندیتوپ په موخه د جوړ شوي قانون له مخې د هېواد په یو شمېر ولایتونو کې، نیږدې (۲۵) مېرمنې له کورني تاوتریخوالي څخه ژغورلې او له خپلو شرعي حقونو څخه برخمنې کړې دي.
