زابل کې محتسبینو د نورو امارتي ادارو په همکارۍ پر هټۍ والو رسمي نرخپاڼې ووېشلې
د زابل ولایت د امر بالمعروف، نهی عن المنکر او شکایتونو اورېدلو ریاست په مشرۍ او د نورو امارتي ادارو په همکارۍ د احتکار د مخنیوي کمیټې له لوري پر سوداګرو او هټۍ والو د لومړنیو توکو د خرڅلاو لپاره رسمي نرخپاڼې ووېشل شوې.
یاده کمیټه چې د یو شمېر امارتي ادارو استازي یې غړي دي، د بازار د وضعیت، د خلکو د اړتیاوو او د ناوړه ګټې اخیستنې د مخنیوي په موخه یې د خوراکي او لومړنیو اړتیاوو د توکو بیې وڅېړلې او د شریعت، نافذه قوانینو او د اسلامي امارت د لارښوونو سره سم یې رسمي نرخپاڼې پر ځایي هټۍ والو او سوداګرو ووېشلې او له هغوی یې وغوښتل، چې له ټاکل شویو بیو څخه سرغړونه ونه کړي، د احتکار، په لوړه بیه خرڅلاو، دوکې او له هر ډول ناوړه کړنو له کولو ډډه وکړي.
د یادولو وړ ده، چې د امر بالمعروف وزارت له لوري په هېواد کې د احتکار مخنیوي او تاریخ تېر موادو د له منځه وړلو په موخه جوړې شوې کمیټې به په دوامداره توګه د بازارونو څارنه کوي تر څو د نرخپاڼو عملي کېدل یقیني شي او د ښاریانو اقتصادي ستونزې تر ممکنه بریده راکمې شي.
