محتسبین: د نشه یي توکو کارول یو ناروا عمل او په ټولنه کې مو حیثیت له منځه وړي
د فراه ولایت محتسبینو په دې ولایت کې د روږدیو د درملنې روغتون څخه د څارنې پر مهال هغوی سره په اصلاحي ناسته کې وویل: د اسلامي امارت مسؤلینو ته تاسې ټول د خپلو اولادونو په څېر یاست او لومړنۍ هڅه یې ستاسې روغتیا او په سالمه توګه خپلو کورنیو ته سپارل دي.
محتسبینو وویل، د نشه یي توکو کارول مو په ټولنه کې حیثیت له منځه وړي او شخصیت مو داغ داره کوي. اوس په تاسې د الله جل جلاله لوی کرم دی چې د ښه ژوند کولو فرصت یې در کړ.
د محتسبینو په وینا: موږ ستاسې د معنوي جوړښت په پار له تاسې سره اصلاحي ناستې کوو تر څو تاسې په جسمي او معنوي توګه خپلو کورنیو ته روغ ستانه شئ.
دغه راز د یاد روغتون مسؤلینو د محتسبینو دغه کړنه وستایله او له هغوی سره یې په ټولنه کې د معروفاتو اقامې اومنکراتو مخنیوي کې د هر ډول مرستې ژمنه وکړه.
