ننګرهار ولایت کې یوه مېرمن له ۲۷ کلونو وروسته له خپلې مور او وروڼو سره یو ځای شوه
د ننګرهار ولایت د امر بالمعروف، نهی عن المنکر او شکایتونو اورېدلو ریاست مسؤلینو په هڅو یوه مېرمن له ۲۷ کالونو وروسته له خپلې مور او وروڼو سره یو ځای شوه.
د یاد ولایت د امر بالمعروف ریاست د مسؤلینو په وینا: یاده مېرمن چې له تېرو ۲۷ کلونو راهیسې د خپلې مور کور ته له تګ څخه منع کړل شوې وه او د بې معنی غیرتونو او ناوړه دودنو پر اساس ځورول کېدله او له جدي کورني تاوتریخوالي سره مخ وه، د امر بالمعروف د مسؤلینو په هڅو د دې غیر شرعي عمل مخه ونیول شوه.
مسؤلین ډاډ څرګندوي، چې په پوره توان به د مېرمنو له شرعي حقونو څخه دفاع کوي او د هغو ناسمو دودونو مخه به نیسي چې له امله یې د مېرمنو شرعي حقوق له ګواښ سره مخ دي.
د یادولو وړ ده، چې د دې وزارت مسؤلینو د پلازمېنې کابل په ګډون د مېرمنو د نورو حقونو لکه میراث، ولور، نفقې او خپلې خوښې نکاح تر څنګ سلګونه مېرمنې له کورني تاوتریخوالي او کورنیو بندخونو څخه ژغورلې دي.
