ننګرهار کې محتسبینو په تېر یوه کال کې د مېرمنو اړوند ۴۰۹ قضیې حل کړې دې
د ننګرهار ولایت د امر بالمعروف، نهی عن المنکر او شکایتونو اورېدلو ریاست مسؤلینو د مېرمنو د حقونو خوندیتوب او په دې برخه کې د ناوړه دودونو د مخنیوي په موخه په تېر یوه کال کې د مېرمنو حقونو اړوند (۴۰۹) بېلابېلې قضیې حل کړې دې.
د یاد ولایت د امر بالمعروف مسؤلین وایي، چې په تېر یوه کال کې محتسبین توانیدلي چې د ننګرهار په ښار او ولسوالیو کې د ۴۰۹ ناخوښه ودونو، کورني ظلم، په بدو کې ورکړې، طلاق، میراث، ولور، کورني بند او ورته نورو اړوندو پېښو مخنیوی وکړي.
بلخوا د دې وزارت مسؤلین ډاډ څرګندوي، چې په پوره توان به د هغو ټولو بدو پېښو، ناوړه دودونو او بې معنا غیرتونو مخه نیسي چې له امله یې د مېرمنو شرعي حقوق تر پښو لاندې شوي وي او زیاتوي چې تر اوسه یې زرګونه مېرمنې له کورني ظلم، ناخوښه ودونو او کورني بند څخه ژغورلې او زرګونو مېرمنو ته یې د میراث او ولور شرعي حق سپارلی، چې په دې پار به یې کړنې لا هم دوام ولري.
