په بغلان کې د درې کلنۍ په عمر په بدو کې ورکړل شوې نجلۍ د محتسبینو له لوري وژغورل شوه
د بغلان ولایت د امر بالمعروف، نهی عن المنکر او شکایتونو اورېدلو ریاست محتسبینو د دې ولایت په پل حصار ولسوالۍ کې یوه مېرمن له اجباري نکاح څخه وژغورله.
په دې تړاو د یاد ولایت محتسبین وایي: یاده مېرمن چې (۲۲) کاله وړاندې د درې کلنۍ په عمر په بدو کې ورکړل شوې وه، د دې ولایت د امر بالمعروف ریاست ته عارضه شوه، چې نه غواړي نکاح وکړي.
محتسبین وایي: پر یاده قضیه له خبرېدو وروسته یې د مېرمنې د شرعي حق د ورکړې په موخه د یاد ولایت د حج اوقاف ریاست او د قومي مخورو په منځګړیتوب د دواړو کورنیو تر منځ د ۱۵۰٬۰۰۰ افغانیو په بدل کې روغه وکړه او نکاح فسخه اعلان شوه.
بلخوا ځایي اوسېدونکي دا پرېکړه د ټولنیز عدالت د تأمین، د مېرمنو پر وړاندې د تاوتریخوالي ډکو پېښو د مخنیوي او په ځانګړي ډول د جبري ودونو د مخنیوي غوره ګام بولي.
