په کابل، تخار او زابل ولایتونو کې څلور مېرمنې له غیر شرعي نکاح ګانو څخه وژغورل شوې
د پلازمېنې کابل، تخار او زابل ولایتونو د امر بالمعروف ریاستونو مسؤلینو د خپلو کړنو پر مهال، د مېرمنو حقونو ته په ژمنتیا په دې ولایتونو کې څلور مېرمنې، چې له اوږدې مودې راهیسې ور سره د خپلو کورنیو له لوري ناوړه چلند کېده او د خپلې خوښې شرعي نکاح حق ترې اخیستل شوی و د محتسبینو په هڅو له ناوړه چلند څخه وژغورل شوې او له خپلو شرعي حقونو څخه برخمنې شوې.
مسؤلین وایي: یادې مېرمنې چې له اوږدې مودې راهیسې ځورول کېدلې او د بې معنی غیرتونو په اساس ترې د شرعي نکاح حقوق اخیستل شوي وو، د محتسبینو په هڅو له خپلو شرعي حقونو څخه برخمنې شوې.
د یادولو وړ ده، چې د یاد وزارت محتسبینو د هېواد په کچه، د مېرمنو حقونو ته د رسېدنې په برخه کې سلګونه بېلا بېلو قضیو ته رسېدنه کړې، چې پکې د میراث، کورني تاوتریخوالي، ولور، په بدو کې ورکړې او غیر شرعي نکاح ګانو قضیې حل شوې دې.
