سمنګان کې محتسبینو دوه کوډګر نیولي دي
په سمنګان کې محتسبینو د خرافاتو د مخنیوي په موخه په خلم ولسوالۍ کې دوه کوډګر، چې د دم او تعویذ له نومونو په استفاده یې د کوډو په واسطه د کورنیو ترمنځ نفاق او ستونزې جوړولې او خلکو ته یې د پیسو په بدل کې د کوډو او جادو ناوړه کړنې کولې؛ له ګڼ شمېر سحري کتابونو او غیر شرعي تعویذونو سره نیولي دي.
د یاد ولایت مسؤولینو یې په تړاو وویل: دوه هغه خطر ناک کوډګر یې د کوډو له وسایلو سره نیولي، چې د کورنیو ستونزو د حل په پلمه یې له ځایي خلکو څخه پیسې اخیستلې او ناوړه کړنې یې کولې، چې د نورو څېړنو په موخه به عدلي او قضایي ارګانونو ته ور وپېژندل شي.
محتسبین همدا زار ډاډ ورکوي، چې هیچاته به اجازه ورنه کړي، څو په ټولنه کې خرافاتي او غیر شرعي کړنې ترسره کړي او له خلکو غواړي، چې د ورته شومو پدیدو په له منځه وړلو کې له محتسبینو سره همکاري وکړي.
بل خوا ځایي اوسېدونکي د محتسبینو شتون د ټولنې د اصلاح او سمون لپاره اساسي اړتیا بولي او له هغوی غواړي، چې په ټولنه کې د نورو منکراتو د مخنیوي تر څنګ د کوډګرو په مخنیوي کې لا ګړندي ګامونه اوچت کړي، څو ټولنه له خرافاتو او شرکي عقایدو پاکه شي.
