په کندز او غزني ولایتونو کې د جبري نکاح او کورني تاوتریخوالي مخنيوی وشو
د امر بالمعروف، نهې عن المنکر او شکایتونو اورېدلو وزارت اړوند د کندز او غزني ولایتونو محتسبینو په دوو بېلابېلو اقداماتو کې د جبري نکاح او اته کلن کورني تاوتریخوالي مخنیوی کړی دی.
د کندز ولایت محتسبینو په وینا د یاد ولایت مرکز اړوند ټانګ سوخته سیمه کې یې د هغې پېښې مخه نیولې چې له امله یې یوه نجلۍ د خپل پلار لخوا د هغې له خوښې پرته په نکاح ورکول کېده او له خپلو حقونو برخمنه کړې ده.
بلخوا د غزني ولایت محتسبینو هم په یو ورته اقدام کې یوه مېرمن چې د خپل خاوند له لوري خپل شرعي حقونه نه ورکول کېدل او د اتو کلونو راهیسې له فزیکي تاوتریخوالي سره مخ وه، ژغورلې ده او له خاوند څخه یې ژمنه اخيستې، څو په راتلونکي کې له ورته کړنو ډډه وکړي.
دا په داسې حال کې ده چې د امر بالمعروف، نهې عنالمنکر او شکایتونو اورېدلو وزارت محتسبینو له دې وړاندې هم د څه باندې اووه زره اجباري نکاح او په بدو کې ورکړې پېښو مخه نیولې ده.
