په روزګان، خوست او غزني ولایتونو کې درې مېرمنې له کورني تاوتریخوالي وژغورل شوې
د روزګان، غزني او خوست ولایتونو محتسبینو د مېرمنو د حقونو خوندیتوب ته په ژمنتیا، په یادو ولایتونو کې درې مېرمنې د خپلو کورنیو له فزیکي او رواني زورونې ژغورلي دي.
د محتسبینو په وینا یادې مېرمنې د خپلو کورنیو له لوري له شدید فزیکي او رواني زورونې سره مخ وې، چې محتسبینو د قومي مشرانو او ځایي مسؤولینو په ملتیا له تاوتریخوالي وژغورلې او له خپلو شرعي حقونو څخه برخمنې کړې.
د یادولو ده چې محتسبینو د یادو مېرمنو کورنیو ته د ښځو د حقونو په تړاو بشپړ معلومات ورکړي او له هغوی یې ژمنه اخیستې څو له دې وروسته له تاوتریخوالي لاس پر سر شي.
همداراز محتسبین ټینګار کوي چې د ښځو پر وړاندې تاوتریخوالی د اسلامي او افغاني ارزښتونو خلاف عمل دی او هېچا ته به اجازه ور نه کړي څو د مېرمنو شرعي حقونه تر پښو لاندې کړي.
دا په داسې حال کې ده چې د امر بالمعروف، نهې عنالمنکر او شکایتونو اورېدلو وزارت د مېرمنو د حقونو خوندیتوب خپل لومړیتوب ګڼي او تر دا مهاله یې د ورته زرګونو پېښو مخنیوی کړی دی.
