په ننګرهار، غزني او لغمان ولایتونو کې پنځه مېرمنې له کورني تاوتریخوالي څخه وژغورل شوې
د امربالمعروف، نهې عن المنکر او شکایتونو اورېدلو وزارت اړوند د ننګرهار، غزني او لغمان ولایتونو محتسبینو پنځه مېرمنې له کورني تاوتریخوالي څخه وژغورلې او د اسلام د مبارک دین په رڼا کې یې هغوی له خپلو شرعي حقونو څخه برخمنې کړې.
یادې مېرمنې چې له تېرو څو کلنو راهیسې د بې معنی غیرتونو او ناوړه دودنو پر اساس زورول کېدلې او له جدي کورني تاوتریخوالي سره مخ وې، د یادو ولایتونو د محتسبینو له لوري وژغورل شوې.
د امربالمعروف، نهې عن المنکر او شکایتونو اورېدلو وزارت محتسبین ډاډ څرګندوي چې په پوره توان به د مېرمنو له شرعي حقونو څخه دفاع کوي او د هغو ناسمو روایتونو مخه به نیسي چې د مېرمنو شرعي حقوق له ګواښ سره مخ کوي.
باید وویل شي چې د دې وزارت محتسبینو د مېرمنو د نورو حقونو لکه میراث، مهر او خپلې خوښې نکاح تر څنګ نیږدې (۱۵۰) مېرمنې له کورني تاوتریخوالي او کورنیو بند خونو څخه ژغورلې دي.
