محتسبینو د ترافیکي پېښې له امله د راپورته شوي قتل موضوع د صلحې او تفاهم په فضا کې حل کړه
د میدان وردګ ولایت د امربالمعروف، نهې عن المنکر او شکایتونو اورېدلو ریاست اړوند د سیدآباد ولسوالۍ محتسبینو د سیمې د دیني علماوو او قومي مشرانو په منځګړیتوب د شیخ آباد حوزې په مربوطاتو کې د دوو کورنیو تر منځ د ترافیکي پېښې له امله د راپورته شوي قتل موضوع په ګډه ناسته کې د صلحې او تفاهم په فضا کې حل او فصل کړه.
یاده پېښه چې د ټکر له امله رامنځته شوې وه د دواړو کورنیو تر منځ د تاو تریخوالي لامل ګرځېدلې وه.
د دې پېښې د ختمولو او د ورورولۍ د ټینګښت لپاره د سیمې محتسبینو، قومي مخورو او علماؤو په ګډه هڅه وکړه چې د دواړو اړخونو تر منځ یو تفاهم رامنځته کړي.
د غونډې په ترڅ کې محتسبینو د یووالي او ورورولۍ پر ارزښت ټینګار وکړ او دواړه لوري یې دوامداره صلحې او ورورولۍ ته راوبلل.
محتسبینو د شهید د ورثې لپاره د عفوې او احسان سپارښتنه وکړه تر څو په ټولنه کې د نفرت او کینې فضا کمه او د سولې لاره روښانه شي.
په پای کې دواړو کورنیو، د سیمې مشرانو او اوسېدونکو د محتسبینو کړنې وستایلې او د همکارۍ د دوام ژمنه یې وکړه، چې دا کار به د سیمې د ثبات او امنیت په ټینګښت کې مهم رول ولوبوي.
