غزني کې د محتسبینو په هڅو پنځو مېرمنو ته خپل شرعي حقوق سپارل شوي دي
د غزني ولایت د امر بالمعروف، نهی عن المنکر او شکایتونو اورېدلو ریاست محتسبینو د دې ولایت په مرکز او ولسوالیو کې تېره اونۍ د خپلو کړنو پر مهال د امیرالمؤمنین حفظه الله له لوري د مېرمنو د حقونو د تأمین په موخه د جوړ شوي قانون له مخې د دې ولایت په څلورو ولسوالیو کې د پنځو مېرمنو بېلا بېلو قضیو ته رسېدنه کړې او هغوی ته یې خپل شرعي حقوق سپارلي دي.
د یاد ولایت محتسبین زیاتوي، چې تېره اونۍ یې د ۴۷ روغتیایي مرکزونو، ۳۵ تعلیمي مرکزونو، ۲۲ واده تالارونو، ۴۷ سلمانیو او ۱۹ ورزشي او تفریحي ځایونو له مسؤلینو سره په اصلاحي ناستو کې د وزارت له لوري په یادو برخو کې ټاکل شوي قوانین اورولي او له هغوی یې غوښتي، چې خپلې کړنې د وزارت د اصولو پر اساس تر سره کړي.
دغه راز د یاد ولایت محتسبینو په ۵۹ بېلا بېلو اصلاحي ناستو کې ځایي خلکو ته د عالیقدر امیر المؤمنین حفظه الله د (۱۷) مې ګڼې فرمان په اساس له هغوی غوښتي، چې د ودونو، حج او عمرې او نورو خوښیو پر مهال دې د ناوړه دودونو له کولو ډډه وکړي.
د یادولو وړ ده، چې د دې ولایت محتسبینو تېره اونۍ په ۲۶ بېلا بېلو اصلاحي ناستو کې، چې پکې نیږدې ۳۰۰۰ کسانو ګډون درلود د مېرمنو د حقونو، د اولاد روزنې، د والدینو احترام، نشه یي توکو د نه کارولو او نه قاچاق، سوداګریزې کړنې د اسلامي اصولو پر اساس تر سره کولو او په دې برخه کې له سود، احتکار او خیانت کولو څخه د ځان ساتنې پر موضوعاتو اصلاحي ناستې کړې دي.
