غزني کې یوه مېرمن له پنځه کلن ظلم او ځورونې وژغورل شوه
د غزني ولایت د ده‌یک ولسوالۍ محتسبینو یوه مېرمن له پنځو کلن کورني تاوتریخوالي، ظلم او رواني ځورونې ژغورلې ده.
د محتسبینو په وینا، یادې مېرمنې ته نه یوازې دا چې نفقه نه ورکول کېده، بلکې له اوږدې مودې راهیسې د خپل خاوند له لوري د فزیکي او رواني ځورونې، شاقه کارونو او ظلم سره مخ وه.
محتسبین زیاتوي، چې د یادې مېرمنې خاوند یې احضار کړی او ترې ژمنه اخیستل شوې، څو له دې وروسته له خپلې مېرمنې سره ښه چلند وکړي او د حقونو بشپړې اداینې ته یې ژمن پاتې شي.
بل خوا ځایي اوسېدونکي د یاد اقدام هرکلی کوي او وایي چې د محتسبینو ورته کړنو او اصلاحي اقداماتو خویندو ته ډاډ ورکړی، چې خپلې ستونزې په زغرده له محتسبینو سره شريکې کړي.
دا په داسې حال کې ده، چې د خوست ولایت محتسبینو هم څه موده وړاندې د خپلو اصلاحي کړنو په ترڅ کې پنځلس مېرمنې له ظلم او تاوتریخوالي ژغورلې وې.
