لغمان کې یوه جبري نکاح فسخه او په ورته قضیه کې د یوې بلې مېرمنې ته مهر ورکړل شو
د لغمان ولایت د امر بالمعروف، نهې عن المنکر او شکایتونو اورېدلو ریاست مسؤولینو د یاد ولایت په مرکز کې د اړوندو مسؤولینو په ملتیا د هغې نجلۍ جبري نکاح فسخه کړې، چې د خپلې کورنۍ له لوري د پیسو په بدل کې داسې يو کس ته په نکاح ورکړي شوې وه، چې رواني ستونزې یې درلودلې.
همدا راز د یاد ولایت د امر بالمعروف، نهې عنالمنکر او شکایتونو اورېدلو ریاست مسؤولینو یوې بلې طلاق شوې مېرمنې ته د هغې مهر حق ورسپارلی دی.
یاده دې وي چې ځایي اوسېدونکي د محتسبینو کړنې ستايي او وایي، چې د محتسبینو په شتون کې د ټولنې اصلاح او ټولنیز عدالت ټینګښت ته هیلې ډېرې شوي او ډاډ ورکوي، چې د ټولنې په اصلاح کې له محتسبینو سره بشپړ همکار دي.
د یاد ولایت محتسبین ډاډ ورکوي، چې د جبري ودونو مخنیوی، د ښځو د حقونو خوندیتوب او د ناوړه ټولنیزو رواجونو پر وړاندې مبارزې ته ژمن دي او هېچا ته به اجازه ور نه کړي څو د خویندو حقونه تر پښو لاندې کړي.
