په بغلان ولایت کې تېره میاشت د مېرمنو د حقونو اړوند ۱۷ بېلا بېلو قضیو ته رسېدنه شوې
د بغلان ولایت امربالمعروف، نهی عن المنکر او شکایتونو اوریدلو ریاست محتسبینو تېره میاشت د مېرمنو د حقونو اړوند ۱۷ بېلا بېلې قضیې، چې پکې د میراث، ولور، نفقې، کورني تاوتریخوالي، کورني بند او ورته نورې قضیې شاملې دي، د یاد ولایت د امر بالمعروف د مسؤلینو له لوري حل شوې دي.
په دې تړاو د یاد ولایت د امر بالمعروف مسؤلین وایي: د یادو مېرمنو بېلا بېلو قضیو ته له هغه وروسته رسېدنه وشوه، چې نوموړې مېرمنې د خپلو شرعي حقونو د تر لاسه کولو په موخه د بغلان ولایت د امر بالمعروف ریاست ته عارضې شوې.
محتسبین زیاتوي، چې د یادو ۱۷ تنه مېرمنو شرعي حقوق هغوی ته وسپارل شول او د کورنیو له غړو څخه یې ژمنه واخیستل شوه، چې په راتلونکي کې د داسې کړنو له کولو ډډه وکړي.
دغه راز د یاد ولایت محتسبینو تېره زمري میاشت کې د خپلو کړنو پر مهال درې قومي دښمنۍ حل کړې او له ښکېلو خواوو یې غوښتي، چې د قومي او ژبني بدیو له کولو او پاللو ډډه وکړي او پخپلو کې سره د وروڼو په څېر ژوند وکړي.
د یادولو وړه ده، چې د یاد ولایت محتسبینو د خپلو کړنو پر مهال په ټولنه کې د خرافاتو د مخنیوي په موخه دوه تنه کوډګر نیولي او د شرعي پرېکړې په موخه یې عدلي او قضایي ارګانونو ته ور پېژندلي دي.
