غزني کې د امر بالمعروف مسؤلینو یوه مېرمن له دوه کلن کورني ظلم څخه وژغورله
د غزني ولایت د امر بالمعروف،نهی عن المنکر او شکایتونو اورېدلو ریاست مسؤلینو د امیرالمؤمنین حفظه الله لوري د مېرمنو د حقونو د خوندیتوب په موخه د شپږ ماده یز فرمان له مخې، د دې ولایت په ده یک ولسوالۍ کې یوه مېرمن له دوه کلن کورني ظلم څخه وژغورله.
په دې تړاو د یاد ولایت مسؤلین وایي: یاده مېرمن چې له تېرو دوو کلونو راهیسې د خپل خاوند او د هغه د کورنۍ لهخوا له فزیکي او رواني تاوتریخوالي، ناوړه چلند او وهلو ټکولو سره مخ وه او له ټولو شرعي حقونو څخه بې برخې وه د محتسبینو په هڅو له شرعي حقونو څخه برخمنه شوه.
محتسبینو د نومړې مېرمنې د خسرګنۍ له غړو سره په اصلاحي ناسته کې د اسلام په مبارک دین کې د مېرمنو د حقونو په تړاو خبرې وکړې او له هغوی څخه یې ژمنه واخیسته، چې په راتلونکي کې د داسې ناوړه کړنو له تر سره کولو ډډه وکړي.
د یادولو وړ ده، چې د یاد وزارت محتسبینو د هېواد په کچه تېره زمري میاشت کې د مېرمنو (۱۲۴) بېلا بېلو قضیو ته رسېدنه کړې او ډاډ څرګندوي چې په پوره توان به د هغو ټولو بدو پېښو مخه نیسي، چې له امله یې د مېرمنو شرعي حقوق له ګواښ سره مخ وي.
