نورستان کې د دوو ځوانو مېرمنو د ناخوښه نکاح مخه ونیول شوه
د نورستان ولایت د امر بالمعروف ریاست مسؤلینو په برګمټال ولسوالۍ کې د خپلو کړنو پر مهال دوه هغه مېرمنې له ناخوښه نکاح ګانو څخه وژغورلې چې د کورنۍ غړو یې غوښتل د ناوړه دودونو په اساس یې د مېرمنو له خوښې پرته په نکاح کړي.
په دې تړاو د یاد ولایت محتسبین وایي: یادې مېرمنې چې د کورنۍ غړو یې غوښتل د هغوی له خوښې پرته یې په جبري توګه په نکاح کړي، چې د یادې ولسوالۍ محتسبینو پر یاده قضیه له خبرېدو وروسته د مېرمنو د شرعي حق د ورکړې په موخه یادې مېرمنې له اجباري نکاح څخه وژغورلې.
مسؤلین زیاتوي: د مېرمنو خوښه په نکاح کې د هغوی شرعي حق دی، چې باید ترې برخمنې شي، چې په وینا یې: «هیڅ چاته به اجازه ور نه کړو، چې د مېرمنو حقوق تر پښو لاندې کړي او د هغو پېښو مخه به نیسو چې د مېرمنو حقوق ګواښي».
دا په داسې حال کې ده، چې د امر بالمعروف، نهې عن المنکر او شکایتونو اورېدلو وزارت محتسبینو د هېواد په ډېری ولایتونو کې د مېرمنو د حقونو اړوند نا خوښه ودونې، کورني بند خونو، کورني تاوتریخوالي، ولور او میراث سلګونه قضیې حل کړې دي او په دې پار یې کړنې لا هم دوام لري.
