شیخ الحدیث محمد خالد الحنفي د نورستان جهادي مدرسې د فاضلانو فراغت غونډه کې ګډون وکړ
د امربالمعروف، نهي عن المنکر او شکایتونو اورېدلو وزارت وزیر شیخ الحدیث محمد خالد الحنفي د نورستان ولایت د جهادي مدرسې فاضلانو د فراغت په مناسبت جوړه شوې غونډه کې د ګډون پر مهال د علم په ارزښت او د علماوو پر مسؤليتونو خبرې وکړې او ویې ویل: اوس وخت را رسېدلی، چې علماء کرام د ټولنې اصلاح او د نظام د استحکام لپاره د خپل ايماني مسؤولیت له مخې په ډاډه زړه کار وکړي.
دغه راز شیخ صاحب د اتحاد پر ارزښت خبرې وکړې او د غونډې پر ګډون والو یې غږ وکړ، چې له هر ډول قومي او ژبني تعصباتو پرته د نظام د ملاتړ لپاره کار وکړي او شته ستونزې د نظام د ټاکل شوې پالیسۍ پر اساس حل کړي چې په وینا یې (د ټولنې جوړښت او له نظام څخه دفاع ستاسې مسؤلیت دی چې باید تر سره یې کړئ).
شیخ صاحب د دیني او عصري علومو پر ارزښت هم خبرې وکړې او ویې ویل، چې اسلامي امارت د دیني او عصري علومو ملاتړ کوي او په دې برخه کې یې مهم ګامونه پورته کړي دي.
د غونډې په پای کې نورو دیني عالمانو هم د دیني او عصري علومو او اسلامي نظام پر ارزښت خبرې وکړې او له اسلامي نظام سره همکاري یې خپل لومړیتوب یاد کړ.
