ننګرهار کې محتسبینو د دوو کورنیو تر منځ (۵۵) کلنه دښمني چې د څلور کسانو د قتل لامل شوې وه حل کړه
د ننګرهار ولایت د امر بالمعروف، نهی عن المنکر او شکایتونو اورېدلو ریاست مسؤلینو د دیني عالمانو، امارتي مسؤلینو او قومي مخورو په منځګړیتوب د قومي او ژبني دښمینو د مخنیوي په موخه په روداتو ولسوالۍ کې د دوو کورنیو تر منځ (۵۵) کلنه دښمني چې د څلور کسانو د مړینې سبب شوې وه حل او پر دوستۍ بدله کړه.
د روغې جوړې په پار جوړې شوې ولسي ناستې ته د امر بالمعروف مسؤلینو په خبرو کې وویل: د اسلامي نظام له حاکمیت وروسته د امیرالمؤمنین حفظه الله د عمومي عفوې تګلاره زموږ ټولو لپاره لوی درس دی، چې باید د کینې او دښمنۍ څخه ځانونه وساتو او پخپلو کې سره د وروڼو په څېر ژوند وکړو.
د هغوی په وینا: اوس چې په هېواد کې امنیت تأمین دی، پر ټولو لازمه ده، چې د یو او بل لاس ونیسي، د ورورولۍ فضاء رامنځته کړي او د اسلامي نظام د پایښت لپاره کار وکړي.
دغه راز ناستې ته، په دښمنۍ کې ښکېل اړخونو، دیني عالمانو، امارتي مسؤلینو او قومي مخورو هم خبرې وکړې او پر دې جوړجاړي یي خوښي وښوده او په دې ولایت کې یې د محتسبینو کړنې وستایلې.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت محتسبینو د هېواد په کچه تېره اونۍ (۱۵) دښمنۍ او (۴۹) وړې شخړې حل کړې او د ښکېلو اړخونو تر منځ یې روغه کړې.
