د کابل ولایت د سروبي ولسوالۍ محتسبینو هغه کس نیولی چې ادعا یې کوله له پېريانو سره د ټلفن له لارې خبرې کوي
د کابل ولایت د امر بالمعروف، نهې عن المنکر او شکایتونو اورېدلو اطرافي ریاست اړوند سروبي ولسوالۍ محتسبینو هغه کس نیولی، چې ادعا یې کوله له پیریانو سره د ګرځنده ټلفن له لارې اړیکه نیسي او د هغو کسانو درملنه کوي چې له پېريانو څخه اغیزمن وي.
د معلوماتو له مخې یاد کس خلکو ته ویل، چې پیریان د هغه خبرې درک کوي او ورسره مستقیمه اړیکه نیسي.
د امر بالمعروف، نهې عنالمنکر او شکایتونو اورېدلو وزارت مسؤولین وایي، چې دا ډول کړنې او ادعاوې خرافات بلل کېږي او له شرعي اصولو سره په ټکر کې دي.
یاد وزارت همداراز ټینګار کوي، چې د ټولنې د اصلاح او خرافاتو او ناسمو باورونو مخنیوي ته ژمن دي او هیچا ته به اجازه ورنه کړي څو د خلکو په باورونو لوبې وکړي او له هغوی څخه په ورته بهانو پیسې واخلي.
دا په داسې حال کې ده، چې د یاد وزارت محتسبینو د ټولنې اوونۍ په اوږدو کې د هېواد له بېلابېلو سیمو څخه ۲۴ تنه کوډګر هم نیولي دي.
