د امر بالمعروف، نهي عنالمنکر او شکایتونو اورېدلو وزارت له لوري د ټولو وزارتونو او مستقلو ادارو د دعوت او ارشاد رئیسانو لپاره یو ورځنی سمینار جوړ شو
د امر بالمعروف، نهي عنالمنکر او شکایتونو اورېدلو وزارت له لوري د یاد وزارت د وزیر شیخ الحدیث مولوي محمد خالد الحنفي، معین صاحبانو او د دعوت او ارشاد لوی رئیس شیخ محب الله مخلص په شتون کې د یاد وزارت د غونډو په تالار کې د ټولو وزارتونو او مستقلو ادارو د دعوت او ارشاد رئیسانو، مدرسینو او امامانو لپاره په امارتي ادارو کې د معروفاتو لا ښې اقامې او ظرفيت لوړونې په موخه یو ورځنی سمینار جوړ شو.
سمینار ته د امر بالمعروف، نهي عنالمنکر او شکایتونو اورېدلو وزارت وزیر شیخ الحدیث مولوي محمد خالد الحنفي صاحب په خپلو خبرو کې وویل: نن د اسلامي شريعت د تطبيق لپاره ښه زمینه برابره ده او الله تعالی د دې چارې ترسره کولو لپاره تاسو غوره کړي یاست.
ښاغلي شیخ صاحب ټینګار وکړ، چې په خپلو دعوتي چارو کې به د چا د موقف پروا نه کوئ؛ هر مسؤول او کارمند خپلو نیمګړتیاوو ته متوجه کړئ او زیاته یې کړه، چې د دعوت په چارو کې د الله تعالی رضا په پام کې نیسئ؛ نور د هیچا پروا مه ساتئ؛ تاسې ته مسؤولیت در سپارل شوی، چې باید په بشپړ اخلاص یې اداء کړئ.
محترم شيخ صاحب وویل: جهاد او دعوت د اسلامي شريعت دوه اساسي رکنونه دي، ځکه د جهاد ثمره اسلامي نظام دی او د دعوت ثمره د ټولنې او فکرونو اصلاح ده.
شیخ صاحب همدا راز زیاته کړه: اسلام همېشه مسلمانان په خپل منځ کې نرمي، ښو اخلاقو او له یو بل سره غوره تعامل ته هڅولي.
په سمینار کې نورو ويناوالو هم د دعوت په ارزښت او د داعي مسؤلیتونو په تړاو خبرې وکړې او د سیمینار له ګډونوالو یې وغوښتل، چې خپلو چارو ته لا ډېر پام وکړي.
یاده دې وي، چې د یادې ناستې په اوږدو کې ګډونوالو د ناستې په جوړېدو خوښي وښوده او زیاته یې کړه چې ورته ناستې د دعوتي چارو د لا ښه والي او ستونزو حل کې ګټورې دي.
په پای کې د غونډې ګډونوالو خپلې ستونزې او د دعوتي چارو د لا ښه والي په موخه وړانديزونه شریک کړل او د ورته لا ډېرو ناستو غوښتنه یې وکړه.
