محتسبینو په ننګرهار او لوګر ولایتونو کې دوه کوډ ګر نیولي دې
د امربالمعروف، نهې عن المنکر او شکایتونو اورېدلو وزارت اړوند د لوګر او ننګرهار ولایتونو محتسبینو د عامه ذهنیت د سمون، غیر اسلامي کړنو د مخنیوي او د یو اسلامي چاپېریال د رامنځته کولو په موخه په یادو ولایتونو کې دوه کوډګر له سحري کتابونو او وسایلو سره یو ځای نیولي، چې د نورو څېړنو او شرعي پرېکړې په موخه به عدلي او قضیي ارګانونو ته ور وپېژندل شي.
د محتسبینو په وینا: یاد کوډګر چې د غیر شرعي کړنو په اساس یې د ګڼو کورنیو ترمنځ نفاق او کورني جنجالونه را پورته کړي وو او له ځایي خلکو یې زیاتې پیسې اخیستې د محتسبینو له لوري ونیول شول، چې د شرعي پرېکړې په موخه به عدلي او قضایي ارګانونو ته ور وپېژندل شي.
محتسبین ډاډ څرګندوي، هیڅ چاته به اجازه ور نکړي چې په ټولنه کې ناروا اوغیر شرعي کړنې تر سره کړي او په پوره توان سره به د هر هغه منکر مخنیوی وکړي چې عامه ذهنیت خرابوي او د منکراتو خپراوي ته لار هواروي.
د یادولو وړ ده، چې د امربالمعروف، نهی عن المنکر او شکایتونو اورېدلو وزارت له لوري پر غیر شرعي دمونو او تعویذونو وروسته د پلازمېنې کابل په ګډون د هېواد په ټولو ولایتونو کې زرګونه کوډګر نیول شوي او په دې پار یې کړنې لا هم دوام لري.
