هلمند کې د امر بالمعروف او نهې عنالمنکر قانون لاښه پلي کېدو په موخه لویه ولسي غونډه جوړه شوه
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د امر بالمعروف او نهې عنالمنکر قانون لا ښه پلي کېدو، د خلکو د ستونزو اورېدلو، معروفاتو اقامې او منکراتو مخنیوي او عامه پوهاوي په موخه هلمند ولایت ته سفر وکړ او د یوې لویې غونډې په ترڅ کې یې د دې ولایت له ملکي او نظامي مسؤولینو، علماء کرامو، قومي مشرانو، ګذر وکیلانو او ګڼ شمېر ځوانانو سره وکتل.
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د هلمندي ولس له قربانیو قدردانی وکړ او زیاته یې کړه چې د اسلام دښمنان تل هڅه کوي ترڅو نړۍوالو ته د منفي تبلیغاتو له لارې د امر بالمعروف او نهې عنالمنکر وزارت غلط انځور وړاندې کړي؛ نو اوس د ټولو او په ځانګړې توګه د دیني عالمانو او قومي مشرانو دنده جوړېږي ترڅو د محراب او منبر له لارې د دښمن پر وړاندې مبارزه وکړي.
شیخ صاحب همداراز ټینګار وکړ چې د نظام غېږ د ولس پر مخ خلاصه ده، که هرڅوک شکایت او یا کومه ستونزه لري په ازادانه ډول دې د امر بالمعروف وزارت د شکایتونو اورېدلو برخې سره شریکه کړي؛ حل او اورېدلو ته یې ژمن یو.
نوموړي همداراز له مسؤولینو، قومي مشرانو او دیني عالمانو وغوښتل ترڅو د امر بالمعروف او نهې عنالمنکر قانون پلي کولو او تر نورو رسولو کې له یاد وزارت سره مرسته وکړي.
ورته مهال ځایي مسؤولینو، قومي مشرانو او دیني عالمانو د امر بالمعروف او نهې عنالمنکر ترسره کول د ټولو مسلمانانو ګډه وجيبه وبلله او ډاډ یې ورکړ چې د امر بالمعروف او نهې عنالمنکر قانون پلي کولو ته ژمن دي او یاده برخه کې به له هېڅ راز مرستو درېغ و نه کړي.
هېره دې نه وي چې د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د مشرتابه مقام له لارښوونې سره سم د امر بالمعروف او نهې عنالمنکر قانون لا ښه پلي کېدو په موخه ولایتي سفرونه کوي او له ځایي مسؤولینو او اوسېدونکو سره ناستې ترسره کوي چې په پایله کې یې د معروفاتو اقامې او منکراتو مخنیوي په برخه کې د پام وړ بدلون راغلی دی.
