ارزګان کې نظامي مسؤلینو ته د ا.ا.ا مشرتابه او امربالمعروف وزارت سپارښتنې وړاندې شوې
۱۴۴۳/۹/۲۱
د ارزګان ولایت د امربالمعروف نهي عن المنکر او شکایتونو اورېدلو ریاست له لوري د دې ولایت امنیتي حوزو نظامي مسؤلینو ته د ا.ا.ا. د مشرتابه او امربالمعروف وزارت سپارښتنې وړاندې شوې او له هغوی یې وغوښتل چې د دې سپارښتنو د پلي کولو ترڅنګ دې له خلکو سره نیک چلند وکړي.
محتسبینو همدارنګه د همدې فرمان پر اساس له مجاهدینو وغوښتل چې خپل نیتونه سم کړي او پر هغوی یې غږ وکړ چې د خپلو مشرانو انځورونه دې پر موټرو نه لګوي او د همدې فرمان په اساس په هر کنډک دیني مبالغ ګمارل شوی تر څو مجاهدین له دیني احکامو خبر کړي.
دغه راز محتسبینو د دې ولایت د خاص ارزګان ولسوالۍ د زندان له مسؤلینو سره ولیدل او له هغوی وغوښتل چې د ا.ا.ا. له لایحې سره سم له زندانیانو سره نیک او غوره چلند وکړي.
د محتسبینو له څرګندونو وروسته د یاد زندان مسؤلینو ژمنه وکړه چې د ا.ا.ا. د مشر تابه او امربالمعروف وزارت د لایحې مطابق به له زندانیانو سره نیک چلند کوي.
